منتديات همس المصريين

منتديات همس المصريين (http://www.hmsmsry.com/vb/index.php)
-   همس السياسة والقلم الساخر (http://www.hmsmsry.com/vb/f86)
-   -   موت يا حمار (http://www.hmsmsry.com/vb/t11691/)

رياض العربى 04-23-2012 04:29 AM

موت يا حمار
 
شباك على الثورة

موت يا حمار!

الله أكبر وحصوه فى عين اللى ما يصلى على حضرة النبى الشعب المصرى أهه واللى ما يشترى يتفرج وأنا لسانى وجعنى من كتر كلامى مع اللى كانوا مراهنين على التسويف والاستعباط عشان الشعب المصرى
يزهق ويلعن سنسفيل الثورة والثوار ويرجع تانى يخش القمقم وياخد له تعسيلة وموت ياحمار وتتحول أعظم وأنبل ثورة فى هذا العصر إلى مجرد أعمال شغب أو حتى مطالب فئوية وانتهت فى حينه بعد أن تدخلت قوات الأمن المركزى وفضت الاعتصام وثورة ثورة فرغت الحدوتة مش ده كان كلامك ياميشو؟
فأجاب ميشيل على استحياء
ـ دا ما كانش كلامى أنا لوحدى ياعم أحمد.
قلت:
ـ أمال كان مين معاك تانى.
قال:
ـ غالبية المثقفين من أصدقائنا كان كلامهم كده.
قلت له:
ـ ياسيدى ميت نيلة عليك وعلى المثقفين من أصدقائنا.
ضحك وقال:
ـ وحتى الدكتور أشرف؟
قلت:
ـ دا كله إلا الدكتور أشرف سلامة بالذات لأنه ربنا يتمم شفاه عبارة عن عدوه واشتهت ثايبة وهو الوحيد فيكم اللى كان شاركنى التفاؤل ومراهن على الشعب المصرى وحاطط فى بطنه بطيخة صيفى.
ضحك ميشيل وقال:
ـ ماهو يا إما إنكم تافين فى بُق بعض يا إما بقى.
قلت له:
ـ كمل يا أمه إيه؟
قال ضاحكاً:
ـ مافيش داعى نخوض فى الأعراض.
قال الدكتور أشرف سلامة:
ـ أنا مولود فى القاهرة وعمك أحمد مولود فى الشرقية وأنا من أم وعمك أحمد من أم تانية يامعفن.
فقال ميشيل:
ـ أنا ما أقصدش الأم أنا أقصد عدم المؤاخذة الأب.
قلت:
ـ أبويا كان فى الزقازيق والست أم أشرف كانت فى مصر.
قال:
ـ برضه أنا ما أقصدش أبوك انت ممكن يبقى أبوالدكتور مثلاً.
وفجأة انطلق صوت المغنى من التليفزيون
قولوا لأمى ماتزعليش
وحياتى عندك
ماتعيطيش
قولوا لها معلش يا أمى
أنا أموت
وبلدنا تعيش
يا بلادى يابلادى
أنا باحبك يابلادى
< < <
قلت وأنا أبكى:
ـ هل ممكن هذا الشعب يموت؟
قال الدكتور أشرف
ـ كان مات من زمان ياعم أحمد.
قال ميشيل وهو يبكى:
ـ بعد الشر عليه من الموت شعب مصر المحروسة أستاذ كل الشعوب وعاشق الحياة

بقلم : احمد فؤاد نجم


د/ إلهام 04-23-2012 04:52 AM

رد: موت يا حمار
 
ههههه
طبعاً مش هنكر إن فى بداية قرائتى للموضوع كنت هصرخ مش فاهمه حاجة وبضحك على الألفاظ والكلام
وخصوصا كم كلمة كده
لكن مجرد ما ختمت بأغنية قولوا لأمى متزعليش
بجد إنتابتنى حالة من الألم والخوف
كل الشكر لك رياض للموضوع الرائع
تحياتى لك ولـ عم أحمد وللسيد ميشو

على بابا 04-29-2012 05:41 AM

رد: موت يا حمار
 
مشكور أستاذ رياض على الموضوع
و فعلا موت يا حمار

بمناسبة كلمة الحمار
فى مثل شعبي بيقول
إن كترت الحمير يبقى من حظ الركيبه

فيه فرق كبير بين الثورة على أشخاص النظام و بين الثورة على النظام نفسه
لكن لما يحصل خلط بين المصطلحين لازم كل حاجة تتهد للأسف

و التجربة كل يوم بتثبت أن بعض سياسات النظام السابق كانت صح
و ده مش كلامى ده الواقع هو اللى بيقول
هيبة الدولة و هيبة القانون و رجال القانون و القائمين على تطبيق القانون أمر لابد منه لإستقرار البلد
لكن لما ضاعت هيبة الدولة و بقى كل شئ مباح حتى التطاول على كبار المسؤلين بصفتهم الشخصية بدعوة ملاحقة فلول النظام
تم إستبدال الصوت العالى و الخلق المتعمد للفوضى و التهديد و التشهير و إثارة الفتنة و الشائعات محل القانون اللى بيحكمنا كلنا
و للأسف نظرا لغياب الوعى و سيطرة بعض الأفراد على عقول المواطنين البسطاء كان فيه تشجيع على زيادة الفوضى
و بقينا فى غابة

و أكيد العيب مش فى الثورة و لا الثوار و لا قيادات الأحزاب
أكيد العيب فى المواطنين البسطاء


مشكور استاذ رياض على الطرح الهادف


رياض العربى 04-29-2012 07:31 PM

رد: موت يا حمار
 
تعقيب جميل من عل بك بابا

شكرا على رد الجميل و مرورك الكريم

ارق تحياتى


الساعة الآن 11:54 AM

Powered by vBulletin® Copyright ©2000 - 2019, Jelsoft Enterprises Ltd.
SEO by vBSEO ©2011, Crawlability, Inc. TranZ By Almuhajir
adv helm by : llssll