منتديات همس المصريين

منتديات همس المصريين (http://www.hmsmsry.com/vb/index.php)
-   همس الفضفضة النفسية (http://www.hmsmsry.com/vb/f8)
-   -   كف عن المحروم أذاك (http://www.hmsmsry.com/vb/t121040/)

حسام السعيد 10-02-2018 10:50 PM

كف عن المحروم أذاك
 
كف عن المحروم أذاك
كف عن المحروم أذاك
امبارح كنت في زياره لشيخي ، والكلام خدنا لحد ما حكي لي عن واحد وزوجته ربنا قدر انهم ميخلفوش فتره كبيره لحد ما وصل سنهم الاربعين واكتر وبكل الرضا الظاهر عاشوا حياتهم وخدوا بالاسباب وعمليات الحقن المجهري القاصمه للظهر والمال ، والم الحقن ومراره الانتظار ، بين السما والارض تنتظر ان ترفع او يخسف بك وبقلبك الارض
وفجأه تدب في رحم الزوجه روحا من امر الله ، وتحمل مش بس في طفل لالا تحمل في توأم
اه والله اتنين
انت متخيل سنين عجاف مرت عليهم ، من اول يوم خطوبه وهما بيحلموا يكون ليهم ذريه توحد ربها وتحفظ القران وتكون سند ، ووحده وحده اختاروا اسمائهم ، لحد ما ربنا جمع بينهما وحسوا ان خلاص حلمهم هيتحقق وقربت الفرحه من قلوبهم بس شهر ورا التاني والرحم لسه فاضي والحضن ساقع مفيش حته منه مدفياه ،
متخيل سؤال الناس كل شويه.. ها مفيش حاجه جايه!! .. يلا شدي حيلك ،
متخيل انها بكت كتير علي مخدتها لاحساسها بالعجز ، واد ايه الوجع بينهش في روحها ، ومتخيل هو كان عامل ازاي وهو بيموت من الحنين بس كان لازم يتماسك قدامها لانه ثباتها وسندها ولو وقع هي هتوقع وراه ، كل المعركه دي محدش يعرف عنها شي غير رب كل شي ، مقفول عليهم بابهم ليصارعوا الوجع ثم يخرجوا للناس بمنتهي الرضا..

كبر الطفلين في بطنها وهي تقرأ كتاب الله وتتحسس بطنها وترقيهم ، وتتابع الايام والثواني وهي شايفه حلمها بيكبر برحمه الله بغض النظر عن وجع الحمل والمه بس كان الم لذيذ لانه بعده فرحه لالالا فرحتين
وفجأه وبدون مقدمات ولد منهم يموت في بطنها لاسباب قدرها الله ،
فتره تانيه من الوجع جوا احشائها جزء حي وجزء ميت ودقات قلبها مشفقه ع الميت وداعيه الله الحي للطفل الحي
ثواني الفرح بقت سنين وجع وقلق وترقب ، ويمن الله عليها بأن جاء حلمها يتنفس كفلقه قمر وتلمسه بايدها وتشم ريحته ، وتحفظ ملمحه لالا تنحت ملامحه جوا جدران قلبها
الحمد لله علي نعمته وتفرح ويفرح الجميع ، ويمر اسبوع ليسقط الرضيع بين يديها صريعا يلحق باخيه وينتظر والديه في جنه الله ، ايوه التاني مات بعد اسبوع بالضبط بعد ما شفته بعينها وفطمت وجعها مع اول رشفه من فمه الصغير لثدي يحن لهذه اللحظه
وبكل الصبر والثبات وقف الزوجين امام المعزين والمصبرين بالبسمه والرضا يحمدون الله ويثنون عليه بالخير والحمد لله علي قدره
حتي اذا رجعوا شقتهم الصغيره دخلو تلك الغرفه التي اعدوها للطفلين وبعد لحظات صمت نظروا نظره واحده لبعضهم وانفجرا بكاء كطفلين يتعانقان علي الوجع ، يئنان بصمت ، ثم ينفجرا مره اخري

ليس اقسي من ذلك الوجع والحزن الذي يستبيح فينا كل ما يستطيع ان ينهشه ،
ليس من حقك ان تحكم علي تجربه احد ما لم تعش وجعه ، كف عنه اذاك ولسانك فيكفيه ما يلاقي في خلوته
لله قلبي وله مرجعي ولا نقول الا ما يرضي ربنا اليه يرجع الوجع كله
قلتلي بقي انت حزين ليه ؟!

بسنت 10-14-2018 02:51 AM

رد: كف عن المحروم أذاك
 
شكرا جزيلا يا بشمهندس
دمت بخير

Adel Radwan 07-03-2020 01:07 AM

رد: كف عن المحروم أذاك
 
بارك الله فيك


الساعة الآن 09:14 PM

Powered by vBulletin® Copyright ©2000 - 2020, Jelsoft Enterprises Ltd.
SEO by vBSEO ©2011, Crawlability, Inc. TranZ By Almuhajir
adv helm by : llssll